(Click HERE to read this letter in English)
"IZwi laba yinyama,
lahlala phakathi kwethu"
Kulonyaka njengaminyaka yonke sizobe sihlangene sonke kanyekanye ohambweni oluyingcwele lonyaka eNgwavuma lwesifundaBhishophi sethu. Sizohlangana mhla ziyi 18 kuSeptember. Ngimeme uMbhishophi uTaddeus Xolelo Khumalo (uMbhishophi waseShowe) ukuba abe ngumholi wombungazo.
Kusukela kulonyaka ka2011, ngithanda ukuba ingqikithi yonyaka yohambo oluyingcwele isihole unyaka wonke, hhayi usuku olulodwa. Inhloso yami ukuba ngimemezele ingqikithi kuqala uJuly (1st July) minyaka yonke ukuze sisizakale ekuzilungiseleleni ohambweni olungcwele lonyaka, kepha ingqikithi ayisabalale yendulele usuku lohambo oluyingcwele.
Ngizothanda ukuba kube nguMoya osiholayo kuloluhambo lwamihla yonke njengamaKristo kulonyaka. Akube amazwi asisiza ukuba sikhule njengamaKristo, njengabafundi kanye nabaPhositoli bakaJesu. Ingqikithi ayibe ingxenye yomkhuleko wami nawe, ingxenye yezintshumayelo zethu, ukugxilisa emfundisweni yeKhathekisima, imihlangano yamaqembu (small Christian communities), Umhlangano weNhliziyo engcwele cwe kaJesu, Umhlangano ka-Anna Ocwebileyo, uJohannes ocwebileyo, Ubulungiswa noXolo (Justice and Peace), abasha kanye nabanye.
Uqwembe lwemibhalo olulobe ingqikithi yonyaka kufanele lume ngomumo. Qinisekisa ukuthi loluqwembe lubekwa endaweni ebonakalayo ukuze sikhumbule njalo inggqikithi yonyaka. Sihlela indlela yokuba sabelane ngalengqikithi kwiFACEBOOK ebizwa nge-Ngwavuma, ukuthumela imibiko (sms) ngomakhalekhukhwini kulabo abangathanda ukuthunyelelwa.
Uma singacabanga amaculo amasha, amakhorasi asungulwe yithina kanye nemidwebo yabantwana ukuze iboniswe ngokunamatheliswa emasontweni.
Ngamafushane, asizameni ngayo yonke indlela ukusiza omunye nomunye ukugxilisa lengqikithi.
* * *
Inggqikithi yohambo oluyingcwele kulonyaka icaphunwe encwadini umPhositoli uPaulos ayibhalele abaseKholose (3:16)
"Izwi likaKristo alihlale kini kakhulu."
Lamazwi ayisimemo esicacile sikaPaulos ukugcina indawo yezwi likaNkulunkulu ezimpilweni zethu, empilweni yemindeni yethu, emaqenjini ethu kanye nemiphakathi yethu. Sifuna ukuqinisekisa ukuthi sizwa umuzwa wezinhliziyo zethu uvutha uma ekhuluma nathi ezwini njengoba kwenzeka kulabo bantu ababili ohambweni oluya e-Emmaus (Lk 24:32). Sidinga ukuhlangana noJesu uma sifunda, silalela, futhi silandela izwi. Ukuze sazi izwi lakhe kangcono sibe abagxilile kulona, inhlangano ye-Catholic Bible Foundation yaseThekwini izobe isihola emqeqeshweni izimpelasonto ezimbili kuso lesi sifundaBhishophi sethu enyangeni ka-October, lelithimba lizobe likhona futhi emihlanganweni yemiphakathi evikini.
Ngikholwa ukuthi uPaulos akafunanga nje ukwazi, kepha ukuphila ngezwi, ngokukhumbula lokho uJesu akutshela abafundi bakhe: "Uma umuntu engithanda uyakugcina izwi lami" (Jn 14:23). UJakobe naye esho lamazwi encwadini: "Anibe abenzi bezwe, hhayi abalaleli nje kuphela, nizikhohlise." Ngoba uma omunye engumlaleli wezwi angenzi, ufana nomuntu ozibuka ubuso bakhe esibukweni, azibone bese ahambe, bese akhohlwe ukuthi ubukeka kanjani (Jk 1,22,24).
Kufanele sazi kakhulu izwi lika-Nkulunkulu, silikhumbule futhi silivumele ukusiqondisa nokusakha. Yebo! NjengamaKristo sakha izimpilo zethu emazwini kaJesu: "Ngalokho yilowo nalowo owezwa lawamazwi ami, awenze, uyakufaniswa nendoda ehlakaniphileyo eyakha indlu yayo phezu kwedwala. Yayithela imvula kwafika izikhukhula, kwavunguza imimoya, yayishaya leyondlu; kepha kayiwanga, ngokuba yayisekelwe yidwala" (Mt 7:24-25). Noma ngabe sidlula ezikhathini ezinzima, impilo zethu, amakhaya ethu, imindeni yethu, kepha angeke sinyakaziswe ngoba sakhelwe phezu kwedwala lezwi lakhe. Siphokophele ukuba bonke abasha bakhele izimpilo zabo ezwini likaNkulunkulu futhi abantwana bakhule ekulithandeni izwi.
Enkulumeni yokuvalelisa kubaZalwane baseEfesu Umphostoli uPaulos uthi: "Kalokhu sengiyanibeka enkosini nasezwini lomusa wayo, yona enamandla okwakha nokwabela ifa pakathi kwabo bonke abangcwelisiweyo" (Izenzo 20,32). Lawa amazwi okugcina kaMphostoli uPaulos evalelisa ayisipho kubona.
Lona akube unyaka osemqoka lapho sikhetha:
-
Ukuzifundela izwi kanye nemindeni yethu.
-
Sikhuleke ngalo (sikhuleke amahubo, amanye amaculo esiwathola eTestamenteni elisha njengeMagnificat, ihubo likaMaria).
-
Asilifunde sizindle ngalo emihlanganweni yabasha, yamaqembu amancane (SCCs'), ezigungwini (sodalities). Asilandele izindlela eziyisikhombisa ezimqoka ekulaleleni izwi.
-
Asilifunde ngaphambi kokuba siye esontweni ukuze sikwazi ukuvula izinhliziyo ekulaleleni izwi.
-
Asiphe ibhayibheli indawo esemqoka kakhulu emakhaya , indawo ehloniphekile.
-
... Lesi sikhala ngesakho! Yikuphi okunye ocabanga ukuthi singakwenza kulonyaka?
Ngaphambi kokuba ngiphethe lencwadi ake nginabele lomkhuleko ongikhumbuza abafundi ababebheke e-Emmaus. Akube umkhuleko wakho nawe, umkhuleko wethu sonke kulonyaka:
Yiba nathi Nkosi Jesu
uhambe nathi ohambweni lwethu.
Ngomusa wakho
vuthisa izinhliziyo zethu
ukhuphule ithemba lethu
ukuze kuthi ngokuhlangana kwethu nabanye
sikubone wena
emibhalweni eyingcwele
nasekuhlephuleni isinkwa.
Lona akube unyaka wokuba sizizwe sisemakhaya ngezwi futhi kube unyaka lapho izwi likaKristo lihlezi lazinza ezinhliziyweni nasezimpilweni zethu. Alibe inyama kithina njengoba laba inyama kuMaria. Yebo, sengathi Izwi lingaba inyama lihlale kithina namuhla naphakade!
Owenu kuKristo nakuMaria
+ José Luis IMC
